Tabwanin te Reirei iaon Tararuaan Raoiroin te Ika man te CPPL

CPPL, BETIO TARAWA - E nang tabe n nakoraoi riki tararuaan raoiroin ana iokinibwai te Kambwana ae CPPL iaon te ika imwiin banen te reirei ae teniua bongina.

E karaoaki te reirei aei nakoia Ana taan makuri CPPL irouia aobitia man te Botaki n Akawa man te Kiribati Seafood Verification Division n raonaki ma kain te Seafood Toxicology Laboratory Division.

E boboto te reirei iaon aron karaoiroan te ika are e na iokinibwaiaki bwa e na raoiroi ibukin te amwarake ao n iraki kainibaire ibukin te iokinibwai.

E reiakinaki naba aron ataakin iika aika boitin ke a nganga, taraakin te ika ae boou, te mwaitoro ae katauaki ibukin raoiroin te ika, ao ai irakin tuan te mwakete, aanga ake e na totokoa rokon te man aoraki nakon te ika, irakin tuan te itiaki(hygiene), ao ai bon aron ataakin ao totokoan kanganga nakon te ika man moan karaoakina ni karokoa are e a tauraoi ibukin te kanaki.

E taorimwiaki te angareirei ni kamwakuran are e a tia n reiakinaki. E mwanenakj te reirei aio  iroun te Tautaeka n Nutiran rinanon ana karikirake ae Tobwaan Waara Program.

Tare te Bentiin ma te Diesel iaon te Abamwakoro ae Teraina

TERAINA - LINE ISLANDS 14 Eberi 2025

E a bane ngkai te bwaa aika te diesel ao te benzine mainanon bain te Koil iaon te abwamwakoro ae Teeraina. E taku te agent ikekei Tebane Takabiri bwa e a bon tibwa bane ni wiiki aika a nako. N taai aika a nako ao e kona n nikrana te diesel ngkai a karako baao ni mwamwananga aika a kabongana te diesel.

N te tai aio ao a kaoti Tianaraita aika a maiu man te diesel ngaia are e a moanna ni kai tare naba te bwaa ae te diesel nte tai aei. E reitia riki te Koil agent n taku bwa e na tara n aki namakinaki te tare aio e ngae bwa e a tare mai nanon bain te kamwabwana ae Koil.

N rongorongona are e anga te agent ao te kaibuke e a tia ni mwananga mai Kiritimati are nanona bwa iaon kawaina ni manga roko naba te bwaa iaon Teraina.

E taku bwa iai naba biriraken taian kambwana ni bwaa iaon Teraina bwa e a nakon 100 tabun n te tai aei. Man kambwana ni bwaa aika 100 tabun aikai ao bwaunan te abwamwakoro bon tii 30 te turam iaon karinan ni bwaa aikai.

E angi iaon te abwamwakoro aio aia kambwana aomata ke bon private ake a bane n rin araia bwa kambwana ni bwaa ao n rinanon naba te karinrin iaan kambwana ni bwaa aika a kinaaki man te kauntira. Man kinaakiia ao a kona naba ni karekei  bwaunaia man ana bwaa Koil.

Ana Induction Burokuraem te Adventurer ao te Pathfinder iaon Teinainano ma Betio

Korobu Church, South Tarawa – Taabati, Eberi 12, 2025

E kirimatata aia ikotaki kaain te Adventurer ma te Pathfinders mai iaon Tarawa Teinainano ma Betio n te Taabati ae nako ibukin aia Induction Program are karaoaki n umwantabun te Aro ni Kaitibong i Korobu.

E moanaki kanoan te burokuraem ma te mwaati n rinnako ma te buraeki, inanon te aki kakarongoa ma te mataku irouia kaain te umwantabu aika Pathfinders, Adventurers, kaain te Aro, ao utu—ao a teirake ni kaota aia karinerine. Aio are e a kanikinaea naba kaukan te burokuraem.

N rokoia taan ua-buraeki ma taani kaira te burokuraem ao a waaki naba Pathfinders ma Adventurers n taekina aia Pledge ma aia Law n rimwiiaki ma aneneakin kunan te Pathfinder.

E anga te taeka ni butimwaai te Mitinare mai Betio ae Taaua ao ni karabwaia ataei ibukin rokoia n ikotaki ma kaain te Aro ibukin boutokaaia ataei.

Imwiina ao e a kanakoaki te rongorongo ae uarereke mairoun te Associate Youth Director ae Tekarimwi Bita, are bon te Mitinare naba mai Bikenibeu. N ana maroro ao e kaungaia ataei bwa a na tiematoa ni maiuakina aia berita ma aia tua ao n nora kakawakin tibwangaia ngkai ngaiia taani kairiri nakon te tai ae na roko inanon te Ekaretia ao Kiribati.

Imwiina ao e a waaki are boni kanoan te bong anne are a waaki iai pathfinders ma

Adventurers ake a tia n rineaki ni waerake n taekin kanoan tabeia ao ni kaura aia taura nenea are kanikinaea Otan Kuristo bwa e na ota nakon te aonnaba.

E matakuakinaki naba te burokuraem aei inanon te kanakobwana ae maeu rinanon te Facebook ao te YouTube.