Motirawa ma te Rau te Rorobuaka ae Kinaaki ae Taratiera Kristiano Hedstrom

KOROBU TARAWA 10 Eberi 2025

E motirawa ma te rau te robobuaka ae kinaaki ae Taratiera Kristiano Hedstrom ao ni katuka ururingana ae bati iaon Kiribati ao bon inanon ana Aro ae te Ekaretia ni Kaitibong.

E rang ururingaki riki Taratiera irouia kaain Kiribati n te anene are e a manga moan kaboua iai tangin ana mwanewe Maroti Riimon n te anene ae 'TE MERIMERI NGKOA NGAI, te anene ae teimatoa n tatang ni karokoa te bong aei."

E rang tatangiraki te anene aei irouia taani kakatekeraoi irouia natiia ma tibuia inanoni Bwanaan Kiribati ma ai aron ae e a manga rang tatangiraki riki ngke e a manga aneneaki n te bwana n ataei mairoun Taratiera.

Taratiera bon te ataeinimwaane ae e a kaman birikatai n te maroro ma te taetaenikawai ma ngke e uarereke, ao e a iriira naba te waaki n anene irouia ataein te roronrikirake n te Aro ni Kaitibong ae te KAYS.

Tiaki ti ngaia ma e a tia naba Taratiera n riki bwa te tia taetaenikawai ao ni kabwarabwara iaon Bwanaan Hope Radio.

E motirawa Taratiera n ana ririki ae 45 ao a tiku imwiina tarina uoman ao teniman mwaanena.

Te I-karekebai Ibukin Katokan Butinakon Manin te Kun ao te Trachoma

NAWEREWERE TARAWA - 10 Eberi 2025

“Te I-Karekebai Ibukin te Marurung Ni Katoka Manin te Kun ao Trachoma” bon ana boto ni iango te bootaki ni kuakua iaon Kiribati ibukiia te botannaomata. Aio ana kanoa te bootaki ni kuakua are e a waaki ni mwakuri iaona nakoia te botannaomata ni kabane mai imwiin te kaukuuki are e karaoaki n 3 n Eberi.

E katerea te bootaki ni kuakua bwa KIRIBATI BON TE MOAN ABA N TE BETEBEKE NI KARAOAKI IAI TE KABUTI BWATIN IBUKIN BUAKANAKIN AORAKI AIKA TE SCABIES AO TRACHOMA N TEUANA TE TAI.

Te Scabies BON TE MAN NI NGONGO IAON TE KUN AO E RANGI N REEREKE RIKI IROUIA ATAEI IAONI BAIA AO WAEIA. TRACHOMA, E KONA NI KAREKEA TE MWAKA N TE REBE NI MATA AO TOKINA BON TE MATAKII.SCABIES AO TRACHOMA, A RANGI N EWEEWE, MA E BON KONA N TOTOKOAKI AO NI KATOKAKI NGKANA E MOAN TAAI NI BWAI N AORAKIAKI.

N te tai aio ao e a tauraoi ni mwakuriia ana kanoa te botaki ni kuakua iaon buakanakin Aoraki aikai bwa ana aki riki. Aio ana tabeaianga te botaki ni kuakua are e buumoaia imwaain rikina.

E teretere n ana kauring te botaki ni kuakua bwa e na bon aki kona ni kaoti ke ni butinako te scabies ao trachoma ngkana arona bwa ti moantaai ni kawarii Clinic aika a kaan ma ngaira ngkana ti noorii kanikina n aron te kiritibutibu ae ngongo iaon te kun riki inanon te wae ao iaon te bai ao iaan te rebe ni mata.

N totokoan aei man te botaki ni kuakua ao ana buti ma bwatin riaan auti ibukin karokoan bwai n Aoraki irouia te botannaomata ni kabane.

Katamaroa Nakon Kateitei n te Kiribati Institute of Technology ae Mwanenaki iroun te Tautaeka n Nutiran.

BETIO, TARAWA - Eberi 9, 2025

E waaki ngkai te mwakuri n onobwai nakon te Katenrinan n Reirei ae te Kiribati Institute of Technology are i Betio.

E taku ana beebwa ni kaongora Ana Aai Komitin Nutiran i Kiribati bwa e mwanenaki te karikirake aei iroun te tautaeka n Nutiran.

Aio te karikirake ae na uarokoa aia kateitei taani makuri ma ataein KIT nakon tamnei n kateitei aika kinaaki n boong aikai ao n raonaki ma katean te tabo n reirei ae boou ibukin karikirakean ana konabwai te roro n rikirake are karaoaki iaan te reitaki ma ChildFund Kiribati.

E reitaki te mwakuri ni kateitei aei irouia taani mwakuri man Reeves and Egis, n ikotaki ma taan makuri mai Kiribati, ibukin kakoroan te kanoa n mii aio!