E Anga Ana Taeka n Rainanoanga te Ekaretia ni Kaitibong ibukin Tiarite Kwong

Maati 7, Korobu Tarawa

E a tia te Beretitenti n te Ekareita ni Kaitibong i Kiribati ae Pastor Taabua Rokeatau n anga ana taeka n rainanoanga ibukin Tiarite Kwong, te Tia Bitineti ae rang kinaaki ibukin ana tituaraoi, ao nanona ni kani buokia aomata, ao ana ibuobuoki ae bati nakon te Ekaretia ni Kaitibong ao te botannaomata.

N ana katanoata n rainanoanga are ekanakoa iaon Bwanaan Hope Radio ao Bwanaan Kiribati, ao e katuruturua te Beretitenti ana kona Tiarite n atai taian kainnano ao tauraoin nanona n anga te boutoka ike e kainnanoaki iai.

Kinaakin Tiarite iroun te Ekaretia bon karokoan te terewition nakon te reirei ae Kauma i Abemama n akea boona. Aio bon te anganano ae rang kakawaki ae buoka katamaroaan te reirei ibukia ataei, n anganiia te kona ni karekei kaongora aika kakawaki man te aonnaba. Irarikin anne, e a tia ni karokoa naba te intanete nakon te reirei ibukin buokan te waaki n reirei.

Teuana ibuakon ana ibuobuoki ae ai tibwa ngkai riki bon tiaainaakin te boraraoi ma te aro ni Kaitibong ke te Memorandum of Understanding (MOU), are e berita iai bwa e na anga te te channel ae akea boona, ae Channel 2 n ana kanakobwana n te terewition bwa e na toka iai ana kaongora ae boou Kiribati Hope n te terewition. Iteran te boraraoi aei, ao e anganaki te kona ni kabongana ana taua Kiribati Hope ae 50 te miita rietana ao nen ana tabo ni mwakuri ibukin ana tieweti, te irekenrao ae na kona ni buoka karababaan ana rongorogo te Ekaretia.

Inanoon ana taeka n rainanoanga, ao e kaota ana kakaitau Pastor Taabua ae koaua nakon buun Tiarite ae Nei Obera ma natina, ana utu ao raoraona. E nora te bua ae rang buburakaei ae namakinaki irouia ake a kina Tiarite Kwong ao e tataro ibukin Ana rau te Atua ma Ana kabebete bwa e ramwaneia ake a tangiria inanon tain te rawawata aio.

“Ti rang taonaki n te nanokawaki ibukin motirawan Tiarite Kwong,” e taku. Te Beretitenti. “Bon tiaki ti te tia bitineti ae rang n taarena ma bon te aomata naba ni kangai ae rang koaua nanona ni kan ibuobuoki ike e rang kainnanoaki riki iai. Ana ibuobuoki nakon ara Ekaretia, riki nakon ara reirei ae Kauma, e na bon aki kona ni mwaninga te aba. Ti a karababa ara taeka n nanoanga nakon ana utu ao ti tataro bwa Ana rau te Atua E na kaiririia inanon te tai aei.”

Kinaakin Tiarite ae e a tiku ae te akoi, te tituaraoi, ao te tieweti nakoia te botannaomata a na teimatoa n riing nanoia ake a kina. Ana kataratara ma ana mwakuri ibukin katamaroaan te waaki n reitaki ao te reirei iaon Kiribati a na bon tiku mwiia, ao ana ibuobuoki ni kabane a na bane n ururingaki ma te kakaitau inanon ririki aika bati aika na roko. E teimatoa te Ekaretia ni Kaitibong iaon Kiribati ni kakaitau ibukin ana boutoka ae akea n ai arona ao e tei n ti teuana ma te utu ngkai a tabe n rinanon te tai n rawawata aei.