E Tiaoki Kiribati Ni Maten Te Tia Bitineti ae Tiarite Kwong.

Kiribati Hope, Tarawa, 6 Maati, 2025

Inanon rongorongo aika aki kantaningaaki, ao e tiaoki Kiribati n rongorongon maten Tiarite Kwong, te aomata ae te kabanea ni kaubwai ao ni kinaaki inanon te waaki ni bitineti.

E ataaki Tiarite ibukin ana waaki ni buoka rikiraken kaubwain Kiribati ao kabwaiaia kaain Kiribati, ao buana ae aki kantaningaaki aei, e a katuka te bwangabwanga ae a mwaiti ae a kakoaua bwa e kanganga kanoaakina.

Tiarite bon tiaki ti te Tia Bitineti; ma bon maiuia naba kaain Kiribati. Tein ana mwaanga ma ana bwaraki iaon abamwakoron Kiribati, e a tia n noraki kakawakin are e karaoia ibukin karekean kaako aika rang kainnanoaki, man amwarake nakon bwain te auti, nakon rebwerebwe aika kabwaekekea ngkai bubun tanon Kiribati ao a mwaiti riki.

E bati karinean Tiarite ibukin nanona n tangiria kaain Kiribati bwa a na reke irouia bwaai aika rang kainnanoaki n aron te amwarake ao a bati riki.

Ibukin karinean Maten Tiarite Kwong ae karina, ao a bane n in ana titooa nako iaon Kiribati n te bong aei. Te kainabwaabu n ana tabo nako bon te kakoaua ibukin te bwai are e a tia ni karaoia nakoia kaain Kiribati.

E reke matena aio bwa te atu ni maroro irouia aomata, ni kauringaan baai aika e a tia Tiarite ni karaoi, ao riki nakoia irabubua taani mwakuri ake e a tia ni kateirakeia n ana kambwana.

E taku te rongorongo mairouia kaain te utu bwa teniua kiban Air Kiribati nako ae buutaki ibukin uotakin rabwatan Tiarite ma ana utu nako Abemama ibukin kawenean rabwatana irarikia ana karo aika George Kwong, ao tinana..

Ngkai e a butinako taekan matena, ao a tata n roko bwaintangira ma taeka n rainanoanga man mwakoron Kiribati aika kakaokoro. Kaain te tautaeka, taani kairiri, ao boni kaain Kiribati a bane n anga aia rainanoanga ao n tibwai aia ururing ibukin te aomata ae tiaki ti te tia bitineti ma bon te rao naba ni kangai ae tatangiraki.

E a tia naba n riki Tiarite bwa te Tia Tei ngkoa man ana abamwakoro ae Abemama n ana Autintei Kiribati, ao e a tia naba n riki ngaia bwa te Minitita.

Ngkai e tabe n rainanoanga te aba ibukin Tiarite Kwong, ma bon iai titiraki aika mwemwe iaon aron te ana kambwana ma te bwai are e na kona n rotaki iai te botannaomata ni Kiribati. A mwaiti ae a bon iango bwa antai ae na manga tei imwiina irouia ana utu n taua mwiin are e a tia ni karaoia ao n ataaki iai.

A tiku imwiin Tiarite kainnabana, ae Nei Obera Kwong, are e a tia n riki bwa te boua ni boutoka ibukin buuna ao aia bitineti, ao are e riki naba bwa te Manatia Taairekita n te kambwana. Iai naba natina uoman mwaane ao uoman aine.

N te tai aei ao e tiku te kantaninga iaon karinean te aomata ae e a tia ni kabanea maiuna ibukin tobwaan ao tabekirakeaia kaain Kiribati. E na bon teimatoa n ururingaki Tiarite inanoia aomata aika bati ake e a tia ni mwakuri ibukia.