Katabwenaaki te Burokuraem ibukin te Marurung n te Kiribati SDA Mission, Tarawa.

E waaki man te moaningabong aei te burokuraem ni kamarurung nakoia taani mwakuri n te Aro ni kaitibong i Tarawa, ni moa man te kamarurung n nakonako are te “Nakonako N Aki Toki” ke te “Walk for Life” ao n rimwiiaki n te burokuraem ni kaitiaki ibukin karikirakean marurungiia taani mwakuri n te mition n ikotaki ma mitinare ma buuia.

E kairaki te burokuraem aei iroun Dr George Kwong, te Health Director man Aobitin te Aro ni Kaitibong are i Biiti, ao ni buokaki iroun Nei Teera Katarake, te health director man te Kiribati Mission.

E kamatata Dr Kwong ae te burokuraem ni kaitiaki aei e na kanakoa te boitin man te rabwata ao n anga te amwarake ae bongana ibukin buokan manga karikirakean ao kaokan marurungin te aomata.

E na reitinako inanon tenibong te burokuraem aei, ao a kantaningaaki taan iria bwa a na rinanon mooi ni kaitiaki inanon taai aika kakaokoro. Irarikin anne, ao a na ti uoua aia tai n amwarake ni kanaia ae boni katauraoaki n iteran tebwiina te moaningabong. ao iteran teniua n te bwakantaai ibukin buokan te waaki ni kaitiaki nakoia.

Aio bon te waaki ae reitinako ibukin karikirakean te marurung ae e a tamaroa riki irouia taani mwakuri n te Kiribati Mission.

N aia moan katawanou taan ira te burokuraem n iteran tebwiina n te ingabong aei, ao e taku Dr Kwong bwa te amwarake ae karaoaki ibukia n te tai aei boni moan amwarake ae kabanea n tamaroa are a taekinaki ni Karikanibai 1:29 - aika Uaanikai (Fruits), Uee-n-ari (Grain) ni mataia aika matamata.