Kauringaan Bongin te Marurung n te Aonnaba 2025

BONGIN TE MARURUNG N TE AONNABA, 7 April 2025 – iroun T. Angiraoi

E a manga uki mataroan ana tabo ni mwakuri nako te tautaeka n te bong aei imwiin iniia ngkoananoa ibukin karinean te bong ni motirawa ibukin Bongin te Marurung n te Aonnaba.

E kakaraoaki ni katoa ririki kauringaan Bongin te Marurung n te Aonnaba n Eberi 7, are e katuuaki iai taekan te marurung ma katanoataan te marurung ibukia aomata ni kabane.

Bon te tai n noraki mwiin are e a tia ni karaoaki ibukin karikirakean te marurung, ao te tai naba ni kakorakora riki te motinnano ibukin te marurung ae e a kororaoi riki ibukin te tai ae na roko ibukia aomata nako ao kaain Kiribati.

​Te Botonniango ibukin Bongin te Marurung n te Aonnaba n te ririki aei 2025, e kangai "Moanakin te Maiu ae Marurung, te kantaninga ae raoiroi ibukin taai aika na roko." 

Te waaki n te ririki aei e boboto iaon karikirakean marurungiia tiina ao ataei aika tibwa bungiaki man kaumakaia tautaeka ao botaki ni marurung bwa a na kakorakorai riki aia waaki n totoko ao ni kamaunanakoa te mate irouia tiina ao ataei aika tibwa bungiaki, ao ni kamoanibwaia riki marurungiia aine ae na teimaan. ​

E waaki te botaki ni kuakua ni karaoa ana kauring n te ririki aei iaon te abamwakoro ae Butaritari, ao te kantaninga bwa e na manga karaoaki te kauring are n 2026 n te itera Maiaki.

Iaon Tarawa, ao e waaki ana Botaki ni Marurung te Aro ni Kaitibong ni botiia kaain te Ekaretia i Korobu ni bukamarua Bongin te Marurung n te Aonnaba ike a ikotaki kaain te aro iaon Korobu ni karaoa te takakaro n reitaki n reitaki ni kamarurung, ataei, ao ikawai.

E ira naba buakon te reitaki ni kamarurung aei te botaki ni kamarurung mai Nanikaai ae Nei Mum, n takakaro n aron te nete, te biri ao takakaro n te booro n aekaia nako.

Imwiin aei, ao e waaki te reitaki ni katawanou ni mwaneaban te aro i Korobu are a riki bwa irua iai aine man te Mum Group, ao ni katoongaki amwarake aika baeranti man kamarurung, ae akea iai te raiti, ao akea riki te mooi irarikin te ran, are e kaunga te mooi ran ao te kang amwarake aika kamarurung.

E taku te Director n te Botaki ni Marurung n te Aro ni Kaitibong ae Nei Teera Katarake bwa e rang kakukurei reitakin te waaki ni kamarurung n te ririki aei, ao riki noraia aine aika mwaiti ake a roko n reita te waaki ni kauring n te bong are ngkoananoa, ao riki ngkai bon aine aika taaketenaki n te Botonniango n te ririki aei ibukin marurungiia."

Te waaki ae karaoaki aei e aki ti kaota kakawakin te kakamwakuri ao te amwarake ae kamarurung, ma e kamatoa naba kakawakiia aine ibukin karikirakean te marurung iaon Kiribati.