Rootaki Teraina n te Tarika Imwiin Aki Bwabwakan te Karau n te Tai ae Maan.

TERAINA, LINE ISLANDS - April 9, 2025

E namakinaki ngkai te mwautakataka iaon te abamwakoro ae Teraina ibukin maanin te tai ae aki bwabwaka iai te karau. Aio are e a karika te kanganga nakon te ran ni mooi ao e rooti naba maiun te kai n amwarake. A mwaiti aika a rootaki aia mwanibwa n te tarika.

E ataaki Teraina bwa te aba ae iai te ran i nuukana ae moan te mam ao a mwaiti naba taabo ae a rangi ni mam.

E taku Nei Ata Ueanterube, te Island Project Officer i Teraina bwa iai mwanibwa aika a rootaki n te tarika ao n aki kona ni kabonganaaki ibukin te mooi. E taku naba Nei Ata bwa iai naba rootakin te ran ae mam are inuukan te aba ngkai e a ora ao n aki rang iabubuti n arona n taai aika nako.

N te tai aio ao a teimatoa aomata ni karekei aia ran ni mooi man taabo aika a raroa are reke iai te mam. E noraki te kanganga aio ni bon kabuta kaawan nako Teraina.

E katautaua Nei Ata bwa ngkana arona bwa e na teimatoa n aki bwaka te karau ao a nang kona n rootaki ngkanne taabo ni kabane n te tarika ao ni karika te kanganga ae bubura nakoia te botannaomata ikekei.