Wareware Rikaaki Te 100 ni Bong N Te Rawannawi Motinnano

E a tabwanin ana kauoua ni wiiki te 100 ni bong n te Rawannawi motinnano ni kamwakuraki n ana rabwata nako te tautaeka imwiin katabwenaakina n 24 ni Beberuare.

ibuakon ana taeka te Beretitenti ae His Excellency Taneti Mamau n tain te kaukuuki aei, ao e taku bwa a mwaiti bwaai aika e a tia n noori ao ni kaotinakoi te tautaeka n te motinnano aei bwa ngaai ake a na moanibwaiaki moa, ao ni katamaroaaki riki ibukin uarokoan ana kibunikoora ae“Kakorakoraan te reitaki ao te tobwaraoi ibukin te rikirake.

”Te kibunikoora aio e boni kainanoa te reitaki ae tamaroa ao te tobwaraoi bwa e na kaumaka riki koron bukin ana iango Kiribati ibukin te roro ae ngkai ao are imwiina.

E taku te Beretitenti bwa e turuturu ana iango te tautakea n te Rawannawi motinnano kanoan ana waaki ake e na waaki inanona ibukin kakoroan nanon ana kainibaire ibukin te term aio n ana kanoani mii ibukin 20 te ririki ke te KV20.

149 bootan mwaitin ana Motinnano inanon te Rawannawi Motinnano ao teuana ibuakona boni kakaean riki anga ni karekemwane ibukin karikirake aika a bubura ake ana buoka kawenean aan riin te waaki ibukin Kiribati.

"E na kaumakaki riki te mwakuri korakora n ana rabwata nako te tautaeka ao te naan SOEs bwa aonga ni koro nanon waaki ake a boonnanoaki." E taku H.E Taneti.

E katuruturua naba te Beretitenti bwa a na taraaki kanganga bwa a na aki tuuka te waaki ma a na rairaki nakon waaki aika a na karekea te kabwaia.

E taku bwa e riai n ribanaaki n te roro ae tabe n rikirake n anua ni maiu aika a tamaroa n aron te tangira ao te ikarinerine ao kakorakoraakin te nano n aba ao ataakin te katei.

Oin te kantaninga n te Rawannawi Motinnano bwa e na kaota aron kakawakin ara konabwai te I-Kiribati ao Kiribati.